港府硬推《逃犯條例》修訂二讀，觸發逾百萬人上街抗惡法，6.12警方暴力清場致市民兩度包圍政總，警民關係緊張。昨日建制派議員發起撐警集會，譚詠麟（阿倫）和鍾鎮濤（阿B）現身站台支持警察，阿倫指不想涉足政治：「再咁落去，香港無得救。再搞落去無人管治到香港。」而阿B則表示要講的是正義，希望子女能知道對錯，又斥現時年輕人「九唔搭八」，強調孝順父母及奉公守法是理所當然的事。
68歲的阿倫和66歲的阿B入行50年，是香港第一代的偶像歌手，兩人的撐警言行令很多人失望，歌迷和網民紛紛攻陷兩人的facebook作出筆伐，繼有歌迷怒碎珍藏多年的阿倫黑膠碟割席，阿B的歌迷亦將偶像的CD丟落垃圾桶，氣憤留言：「返嚟屋企第一件事，揼咗啲九唔搭八嘅唱片落垃圾桶。」。
有網民更貼出阿B和前妻章小蕙的合照，留言：「章小蕙，我們一直怪錯你！你嫁了一個如此九唔搭八冇腦嘅人，你所做的都對！」、「章小蕙，我們一直怪錯你！你是對的，你眼光領先20年！」連商台節目《在晴朗的一天出發》主持潘小濤，亦在其FB貼阿B和章小蕙合照，寫道：「那時，我也曾同情他，認為章小姐不對。或許怪錯了妳，對不起，原來他是無腦九唔搭八的！」前新聞主播伍家廉則在IG的story貼章小蕙相，寫道：「睇完fb，發覺而家變咗萬人齊撐佢。」
很多歌迷都對阿B的「九唔搭八」論好反感，認為作為一個公眾人物，阿B做了一個極差的榜樣，為其是非不分感到好心酸，「枉我早排仲買咗你兩隻唱片，返去第一件事丟去垃圾桶，以後唔使旨意我會買你唱片，我唔會聽啲九唔搭八嘅藝人」、「一直好欣賞你對音樂既熱誠同付出，以及對rock and roll嘅既堅持…但今日對你真係好失望.. 當香港變到極權當道，估唔到你選擇站係石牆一方而非雞蛋。」、「B哥，小弟由温拿出道已經是你們的Fans，記得民主歌聲獻中華更覺你們的正義，但是今日閣下的九唔撘八的言論令人甚是失望，請問有否考慮到人們的無力感，人們的失望。」、「年青人的無助感已去到極點！你還可以話佢哋『九唔搭八』? 你兩位的出現和說話，已令好多香港心痛了！剛剛老婆就喺車上熄咗譚詠麟嘅歌！現在聽到你們歌都有點惡心！」
(資料來源：網上截圖/連結)
